Ggigh thi zemmar inu dhi tha qessist a huma adh awdhegh ghar ijen a teswath nu ceddi (relation) i dhin jar kur ijen zzaynegh ak yemmas, tha mettuth nni idhanegh-d yejjin ghar u madhal (ddunect) a, thenni ixanegh yezrin tamara dh remhayen. A teswath a ixef urzugh ufight dh tha mezdhaget s w'attas dhi xmi kur tha mettuth ttarod mmis. Ssitimegh adh irigh iwdhegh gha minxef urzugh, u ssekkigh tha qessist a dh azul dh'ayyuz yemghar i yemma dh'amezwaru u i marra thi yemmathin nu madhal (ddunect) zig ixef ar ixef.

 

Ssizzaregh'thentid...
Ssizzaregh'thentid tti'ghuyyawin,
Ghar thu'dharth tha wara tha mezwarut,
Rami id'arzmegh thi'ttawin.
Ssizzaregh'thentid...
Tti'ghuyyawin...

Arezmegh'd thi'ttawin inu,
Dhig ijn w'as marra ti'fawin.
Dhig ijn w'as...
Yeccowr dhayes u jenna inu,
S driz u thi rewriwin.
Marra ttek xu zedjjif thghedjji,
Ayyaw...
Ayyaw...
Marra tta'azriwin.
Ayyaw...
Marra tta'azriwin.

Ak w'arzam n thi'ttawin,
Tha mughri inu tharwer,
Thejja awarnas marra thi fawin,
Thejja awarnas ura dhi ttya n tha ffuct,
Uca tharwer dhiha aghirin,
Thejja awarnas ura dhi ttya n tha ffuct,
Uca tharwer dhiha aghirin,
Tharwer...
Ghar ttya n ijn w'udhem,
Tta'ziri...
Dhi ithran...
Ella!
Mayemmi thin!
Mayemmi yinin!
Tha mughri inu tharwer,
Tha mughri inu tharwer,
Ghar w'udhem n ijn tha mzwath,
Ig yezren jar thi mgharin.
Udhem n ijn tha mzwath,
Ig yezren jar thi mgharin.

Dh'udhem nem...
Dh'udhem nem a yemma inu,
A then dhayi iwcin thu'darth inu,
A then dhayi'd yejjin.
A then dhayi'd yejjin.
Yemma inu...

Yemma inu...
Zrigh chem dhin tha zedjjit
X wi tugha dhin...
Dh wen tugha wa dhinni yedjjin.
Udhem nem e tha ziri yareqqen.
A sfanin nem e tha fuct id yenqaren.
Ithran...
Ithran tti'dhi id kidhem yehwan ttu'dimin,
Ig itemsagan dhi ghezran,
Izi ttecowrent tha rawin,
Ithran...
Ithran tti'dhi id kidhem yehwan ttu'dimin,
Ig itemsagan dhi ghezran,
Izi ttiridhen wurawen,
Nettaren xassen marra thi ghufawin.
Nettaren xassen marra thi ghufawin.

Yemma inu...
Yemma inu...
Rami dhayi thezridh,
Thettudh marra min yedjjan tti'warin,
Mghar a mmi inu , a mmi inu
Thissidhay gharem,
Tharridhay gharem,
Dhin i fesyent tha arjijin,
Dhin i sseghdhent thi ghuyyawin,
T'sa nem a yemma inu,
Tha sa nem a yemma inu,
Aemmas atiri am marra thi sawin.
Aemmas atiri am marra thi sawin.

Yemma inu...
Yemma inu...
Rexxu mgharegh, ggigh acewwaf, ggigh tha mmiwin,
Ggigh thighmas,
Tghezzegh thi ghwawin,
Ggigh thenneghni,
Tghezzegh ra thi bawin,
Snegh, txarsegh, ssufgheghd tha friwin,
Dhwigh...
Dhwigh zig harwar nem,
Arsigh dhi tha mwath mani wa thedjjidh,
Ayyaaw...
Ayyaaw marra tta rewriwin.
Arsigh dhi tha mwath mani wa thedjjidh,
Ayyaaw marra tta rewriwin.

Yemma inu...
Yemma inu... ,dhin...
Iraghigh ixef inu s ijn wa war:
A hya win a hya win,
Thin edh yemmac,
I min teanidh cek awarni thin?

Yemma inu...
Yemma inu...
Min xafem yekkin akidhi,
Min xafi thisidh
Min xafi thezridh
Snegh...
Snegh illa yeqseh s wattas wa yehwin.
Yemma inu...
Kkintid xafi thi charriwin.
Kkintid xafi...
Kkintid xafi thi jnawin.
Yemma inu...
Yemma inu...

A hya win a hya win,
Thin edh yemmac,
I min teanidh cek awarni thin?
I min teanidh cek awarni thin?
Awarni thin?

Ghzam radh

Komments

Add New Search RSS

Ari komment
Issem:
Email:	Wa εedjem caεermayi
	Please input the anti-spam code that you can read in the image.